ഒരു കൂട്ടുകാരെന്റെ വീട്ടിൽ നിന്നും മടങ്ങവേ ആണ് വിഷ്ണുവിനെ കണ്ടത്. പാടത്തിനരുകിലെ കനാലിൽ ചൂണ്ടയിടുകയായിരുന്നു അവൻ , അടുത്തുള്ള തെങ്ങിന്റെ ചുവട്ടിൽ അപ്പു എന്ന അവന്റെ നായയും കിടപ്പുണ്ട് . നവംബർ മാസമായിരുന്നിട്ടും ഉച്ചവെയിലിനു നല്ല ചൂടായിരുന്നു.

“എന്താ വിഷ്ണു വല്ലതും കിട്ടിയോ ” സൈക്കിൾ നിർത്തി വിളിച്ചു ചോദിച്ചു ..

” ഓ എന്ത് കിട്ടാനാ ഏട്ടാ .. നമുക്ക് അതിനുള്ള ഭാഗ്യം ഇല്ലല്ലോ .. ഇങ്ങനെ കാത്തിരിക്കാനല്ലേ വിധി .. ചൂണ്ടയിട്ടാലും ജീവിതത്തിലും എല്ലാം ”

ഒരു ഒൻപതാം ക്‌ളാസുകാരന്റെ പക്വത കലർന്ന വാക്ക് കേട്ടിട്ടോ , അവന്റെ ഇടറിയ ശബ്ദം കേട്ടിട്ടോ , ഞാൻ സൈക്കിൾ സ്റ്റാൻഡിലേക്ക് ഇട്ടിട്ടു അവനടുത്തെത്തി . അപ്പു ഒന്നു മുരണ്ടു . അവൻ കയ്യ് ഉയർത്തി അവനോടു വേണ്ട എന്ന് പറഞ്ഞു എന്നെ നോക്കി .

അവന്റെ കണ്ണുകൾ ചുവന്നിരിക്കുന്നു ..

ആ കനാലിന്റെ കരയിൽ ഇരുന്നു അവന്റെ തലമുടിയിൽ വിരലോടിച്ചു ചോദിച്ചു

” എന്ന പറ്റിയെടാ ”

നിറഞ്ഞ കണ്ണുകളുമായി അവൻ തല കുനിച്ചു ഇരുന്നു.

വിഷ്ണു , അവൻ എനിക്കൊരു ജീനിയസ് ആണ് . നാട്ടിലേക്കു പോകുന്നതിനു ഒരു മാസം മുൻപ് അവന്റെ മെസ്സേജ് വരും , വാങ്ങി വരേണ്ട ഇലക്ടോണിക്‌സ് , ഇലട്രിക്കൽ സാധനങ്ങളുടെ ലിസ്റ്റ്. ഒരു പെട്ടി കാണും. വീട്ടിൽ എത്തിയാൽ കറക്റ്റ് ആയി കാശു തന്നു വാങ്ങി പോകും . പലപ്പോളും അച്ഛൻ വഴക്കു പറഞ്ഞിട്ടുണ്ട് , പക്ഷെ ആ ചെറു പ്രായത്തിൽ അവന്റെ അറിവ് ഓർത്തു ഞാൻ ഒരിക്കലും വാങ്ങാതിരിന്നിട്ടില്ല.

“എന്ത് പറ്റി നിനക്ക് , നിന്നെ ഇതുവരെ ഇങ്ങനെ കണ്ടിട്ടില്ലല്ലോ ”

“നന്ദേട്ടാ , നിങ്ങളെന്നല്ല ആരും ഇങ്ങനെ കണ്ടിട്ടില്ല ഏട്ടനറിയാമോ , ഞാനും ഈ സെന്റ് തോമസിലെ പിള്ളേരും തമ്മിൽ ഒരു വെത്യാസവുമില്ല ” ഒരു തേങ്ങലോടെ അവൻ പറഞ്ഞു നിർത്തി

സെന്റ് തോമസ് ഇവിടെ അടുത്ത അനാഥാലയമാണ് , പള്ളിയാണ് അത് നടത്തുന്നത് , പത്താം ക്‌ളാസ് വരെയുള്ള ആൺകുട്ടികളെ ആണ് അവിടെ നിർത്തി പഠിപ്പിക്കുന്നത് .

“നല്ലതു ചെയ്താലും , ചീത്ത ചെയ്താലും ചോദിക്കാനും പറയാനും ആരും ഇല്ലാത്തവർ. “

“കഴിഞ്ഞ ദിവസം ജില്ലാതലത്തിൽ നടന്ന ഓട്ട മത്സരത്തിൽ എനിക്ക് ഫസ്റ്റ് കിട്ടി . അവിടെ എത്ര പേരന്റ്സ് ഉണ്ടായിരുന്നെന്ന് അറിയാമോ ? അവരെ പ്രോത്സാഹിപ്പിക്കാൻ , ഓടിയെത്തുമ്പോൾ ഗ്ലുകോസും വെള്ളവുമൊക്കെയായി . ആ കിട്ടിയ മെഡലുമായി ഒരു ഫോട്ടോ എടുക്കാൻ . ഞാനോ സാറിന്റെ ഒപ്പം പോയി , അതുപോലെ തന്നെ തിരിച്ചു പോന്നു . ആ കിട്ടിയത് എന്തിനാണ് എന്ന് പോലും ചോദിയ്ക്കാൻ ആരും വന്നില്ല , ശരത് ചേട്ടൻ , ബാങ്കിലെ , പുള്ളി മാത്രം വന്നു വൈകിട്ട് വീട്ടിൽ. ”

എനിക്കെന്തോ തൊണ്ടയിൽ വാക്കുകൾ തടസ്സപ്പെട്ടുപോയി

“എന്റെ വീട്ടിൽ കോഴിയും താറാവും മീനും എല്ലാം ഉണ്ട് , എന്തിനാ വളർത്തണത് എന്നറിയാമോ. എനിക്കൊന്ന് സ്നേഹിക്കാൻ . ആരും കാണാതെ എന്റെ സങ്കടം പറഞ്ഞു തീർക്കാൻ . ഞാൻ വൈകീട്ട് സ്കൂളീന്നു വരുമ്പോൾ എല്ലാം കൂടി ഓടി വരും , എന്റെ കാലിന്റെ ചുറ്റിനും കൂടും . ഞാൻ അവിടെ ഇരുന്നാൽ എല്ലാം കൂടി മേത്തു കേറും . എന്തൊരു രസമാണെന്നു അറിയാമോ. ഞാൻ ഇന്ന് വരെ ഒന്നിനേം കൊന്നിട്ടോ, വിറ്റിട്ടോ ഇല്ല .ചത്ത് കഴിഞ്ഞാൽ കൊണ്ടേ കുഴിച്ചിട്ടും. ”

ഒരു നിമിഷം , ഞാൻ ഇരുന്ന സ്ഥലം താണു പോകുന്ന പോലെ തോന്നി .

“ഏട്ടന് അറിയാമോ , ഇടക്ക് സങ്കടം വരുമ്പോൾ, ചൂണ്ടയുമായി ഇവിടെ വന്നിരിക്കും. മീനൊന്നും പിടിക്കാനല്ല , അല്ലേലും ഇരയുള്ള ചൂണ്ടയിലല്ലേ മീൻ കൊത്തു. ഇത് വെറും കൊളുത്തു മാത്രമാണ് . പിന്നെ ഇവിടെ വന്നിരുന്നു ഈ പാടത്തിലെ കാറ്റു കൊണ്ടിരിക്കും . അപ്പൊ ഒരു സുഖവാ, പിന്നെ ചിലപ്പോൾ ഒന്നു മയങ്ങും . തിരക്കാനാളില്ലാത്തതു കൊണ്ട് വീട്ടിൽ നേരത്തു ചെല്ലണമെന്നൊന്നും ഇല്ലല്ലോ. ഇവൻ എപ്പോളും കാണും കൂട്ടിനു”

വിഷ്ണു , അവന്റെ അച്ഛനും അമ്മയും US ഇൽ ആണ് , ഒരു അനിയത്തി ഉള്ളതും അവിടെ . ഇവൻ കുഞ്ഞായിരിക്കുമ്പോൾ മുതൽ ഇവിടെ ആയിരുന്നു . ഇടയ്ക്കു പോകും ഒരു പത്തു ദിവസമൊക്കെ . പിന്നെ ഇങ്ങോട്ടു പോരും. അവര് ഒന്ന് ഒന്നര കൊല്ലം കൂടുമ്പോൾ വരും. നിറയെ കളിപ്പാട്ടമൊക്കെ ആയിട്ടു.

“ആ കാണുന്ന വീട് കണ്ടോ ”

“മനക്കലെ ”

“അതിന്റെ പുതിയ അവകാശിയാ ഞാൻ , കഴിഞ്ഞ മാസം അതും വാങ്ങി ” ഒരു ചെറിയ ചിരി വരുത്തി അവൻ പറഞ്ഞു .

“ഓര്മ വച്ച നാള് മുതൽ മാമനോടൊപ്പമായിരുന്നു ഉറക്കം , പിന്നെ എന്റെ അറാം വയസ്സിൽ മാമൻ കല്യാണം കഴിച്ചു . അപ്പൊ അമ്മുമ്മയോടൊപ്പമായി . ഒരു കൊല്ലം തികച്ചില്ല . അപ്പോളേക്കും മുകളിൽ ഒരു മുറി പണിതു എന്നെ അങ്ങോട്ട് മാറ്റി. ചേട്ടനറിയാമോ ഇരുട്ട് എനിക്ക് പേടിയായിരുന്നു. അങ്ങിനെ ആണ് ഞാൻ ഉണ്ടായിരുന്ന കളിപ്പാട്ട കാറുകളുടെ എല്ലാം ബാറ്ററി അഴിച്ചു രാത്രി മുഴുവൻ LED ലൈറ്റ് കത്തിച്ചു വയ്ക്കാമെന്നു പഠിച്ചത് . പിന്നെ ഒരിക്കൽ വഴീന്നു ഇവനെ കിട്ടി . എന്നെ പോലെ തന്നെ എല്ലാവരും ഉണ്ടായിട്ടും ഒറ്റപെട്ടവൻ . ഞാൻ കൂടെ കൂട്ടി. എന്റെ കട്ടിലിനു താഴെ ഒരു ചാക്ക് വിരിച്ചു കൊടുത്തു. അന്ന് തൊട്ടു എന്നും ഇവൻ എന്റെ കൂടെ ഉണ്ട് .ഒരു നിഴലുപോലെ കൂടെ ”

അവന്റെ പക്വത എന്നെ അത്ഭുതപെടുത്തി.

“നിനക്ക് അങ്ങോട്ട് പൊയ്ക്കൂടേ , US ലേക്ക്”

“എന്തിനു , മൂന്നാം വയസ്സിൽ ഇവിടെ ഇട്ടേച്ചുപോയതല്ലേ . ഞാൻ പോയിരുന്നു രണ്ടു മൂന്നു തവണ . പക്ഷെ നമുക്കൊന്നും പിടിച്ചു നില്ക്കാൻ പറ്റില്ല ചേട്ടാ. നാടൻ ആയി പോയില്ലേ. ഞാൻ അവിടെ പോയി എന്ത് പറയും മലയാളമോ ?. വിനീതക്ക് പോലും ചേട്ടൻ ആണെന്ന് പറയാൻ മടി തോന്നിയ പോലെ. പിന്നെ ടേബിൾ മര്യാദകൾ. അവിടുത്തെ ജീവിതം . ഒന്നും നമുക്ക് പറ്റില്ല ചേട്ടാ. പിന്നെ അവർക്കും . ”

അവന്റെ മനസ്സറിഞ്ഞ പോലെ അപ്പു അവനരുകിൽ എത്തി കൈകളിൽ നക്കി .

“ചുമ്മാതിരിയാടാ , ഏട്ടനറിയാമോ മെയ് മാസം ചേട്ടൻ കൊണ്ടുവന്ന കുറെ സാധനങ്ങൾ , അത് വച്ച് ഞാൻ ഒരു അലാറവും ക്യാമെറയുമെല്ലാം സെറ്റ് ചയ്തു , എന്റെ കോഴിയെ പിടിക്കാൻ വന്ന കുറുക്കനെ ഓടിക്കാൻ. ഓണത്തിന് എല്ലാവരും വന്നില്ലേ. അന്ന് അങ്ങേരു അതെല്ലാം തല്ലി പൊട്ടിച്ചു . എന്തിനാണെന്നു അറിയാമോ, ഞാൻ ഇതെല്ലം ഉണ്ടാക്കി പഠിക്കാനുള്ള സമയം കളയുവാണെന്നു പറഞ്ഞു . അപ്പു ചാടി കുരച്ചതു കാരണം ഞാൻ ബെൽറ്റിനടി കൊണ്ടില്ല. അന്ന് ഞാൻ ഓടി മുറിയിൽ കയറി കട്ടിലിനടിയിലാ ഒളിച്ചേ . ഇവൻ ആ ചാക്ക് ക ഷണം കൊണ്ടെന്നെ പുതപ്പിച്ചു അരികിൽ കിടന്നു . എന്റെ ഓർമ്മയിൽ ആരും അങ്ങിനെ ചെയ്തിട്ടില്ല .”

അപ്പൊ അതായിരിക്കണം അച്ഛൻ വിഷ്ണുവിന് ഒന്നും വാങ്ങി കൊടുക്കരുത് എന്ന് എന്നോട് പറഞ്ഞത് . അവർ വന്നു പറഞ്ഞു കാണും.

“ഇതൊന്നുമല്ല ഏട്ടാ രസം . ഇവർ എല്ലാരും കൂടി എന്നെ ഡോക്ടറുടെ അടുത്ത് കൊണ്ട് പോയി, കൗൺസിലിംഗിന് . അങ്ങേരോട് ഞാൻ എല്ലാം പറഞ്ഞു. ഒടുവിൽ ഇവരെ വിളിച്ചിരുത്തി അങ്ങേരു ഒരു ഡോസ് കൊടുത്തു . വിഷ്ണുവിന് ഒരു കുഴപ്പവുമില്ല , ഇങ്ങനെ ഒക്കെ നടക്കട്ടെ , ഇതൊന്നും ഇല്ലങ്കിൽ അവനു കുഴപ്പം വരുമെന്ന് . അതോടെ അവരൊന്നടങ്ങി. ”

“അന്ന് തോന്നിയാതാ ഇതെല്ലം അങ്ങ് തീർത്തലോ എന്ന് ”

“ഡാ നീ വേണ്ടാത്തതൊന്നും ചിന്തിക്കേണ്ട ”

“ഇല്ല ഏട്ടാ , ഇപ്പൊ എനിക്കൊരു ലക്‌ഷ്യം ഉണ്ട് . ഞാൻ ജീവിക്കും , അവരുടെ മുൻപിൽ . അവരുടേതല്ലാതെ ”

ഞാൻ അവന്റെ തോളിൽ തട്ടി എഴുന്നേറ്റു , നേരം രണ്ടു മണി ആയിരിക്കുന്നു.

“ഡാ ഞാൻ പോകുവാ , നാളെ ബാംഗ്ലൂർക്കു പോകും. നീ എന്തു വേണേലും പറഞ്ഞോ , ഞാൻ വാങ്ങി വരാം ”

“നന്ദേട്ടനും ശരതേട്ടനും ആണെന്റെ ശക്തി , ഞാൻ ഇവിടെ തന്നെ ഉണ്ടാകും ”

ഞാൻ സൈക്കിൾ എടുത്തു മുന്നോട്ടു ചവിട്ടി. വളവു തിരിയുന്നതിനു മുൻപ ഒന്ന് തിരിഞ്ഞു നോക്കി . അവനും അപ്പുവും അവിടെ ഇരിപ്പുണ്ട് .

വീട്ടിലെത്തി സൈക്കിൾ വച്ച് അകത്തു കേറി.

“കൊള്ളം നിങ്ങള്ക്ക് കഴിക്കാൻ ഒന്നും വേണ്ടേ ” ഭാര്യയാണ് .

“വേണ്ട , ഞാൻ ആന്റോയുടെ വീട്ടീന്ന് കഴിച്ചു , കുഞ്ഞു എന്തിയെടി ?”

“നല്ല ചൂടല്ലേ .അവൻ കിടന്നു ഉറങ്ങി ”

ഞാൻ മുറിയിലേക്ക് ചെന്നു , കുഞ്ഞു നല്ല ഉറക്കമാണ് .അവനോടു ചേർന്ന് കിടന്നു , രാവിലെ നുള്ളിയ ഇടതു കയ്യിലെ തടിപ്പിൽ വിരലോടിച്ചു.

“അച്ഛാ എവിടായിരുന്നു ..” പിന്നെയെന്തൊക്കെയോ പറഞ്ഞു എന്റെ കൈകൾ ക്കുള്ളിലേക്കു കയറി ഉറക്കം തുടർന്നു

 

അപ്പോളും എന്റെ മനസ്സ് ആ കനാലിന്റെ കരയിലെ സഹോദരങ്ങൾക്കൊപ്പമായിരുന്നു.

 

—–പീയാർ—–